Os deputados do Grupo Provincial do Partido Popular, xunto a alcaldes e voceiros da zona sur da provincia e a deputada no Parlamento, Raquel Arias, presentaron este venres na estación de Santo Estevo, en Ferreira de Pantón, a moción que defenderán no pleno do próximo martes para reclamar ao Goberno de España servizos ferroviarios de calidade para a provincia de Lugo.
A moción pedirá a unanimidade do pleno para que o Goberno do Estado “cumpra dunha vez con Lugo” algo para o que é necesario, entre outras cuestións, o restablecemento e o reforzo dos servizos que posibilitan a mobilidade dos galegos, tanto no interior coma co resto de España, en particular, recuperando as frecuencias suprimidas pola pandemia e adoptando as medidas necesarias para que a oferta dispoñible en conexións e horarios responda ás necesidades reais de cidadanía.
Denuncian os populares os retrasos acumulados nas obras de electrificación da vía que se están a realizar na vía entre Monforte e Ourense e demandan investimentos que “garantan que a provincia e a cidade de Lugo accedan en igualdade co resto do territorio á Alta Velocidade e á intermodalidade”, algo para o que é imprescindible a execución das variantes ferroviarias dos Peares-Canaval e Rubián.
En canto á seguridade aseguran que, “é mester a supresión de todos os pasos a nivel comprometidos, desbloqueando as obras paralizadas nalgúns deles, e a construción de accesos alternativos que favorezan a comunicación entre as marxes das vías de forma segura, a modernización do material rodante e a gratuidade do servizo, como sucede en Asturias e Cantabria”.
Piden desde o PP que se cumpran os compromisos adquiridos, “As actuais obras de modernización e electrificación (que arrastran atrasos e manteñen pechada a liña entre Ourense e Monforte dende novembro do 2022) non supoñen melloras no trazado, sen esquecer que o Goberno de Pedro Sánchez, co apoio necesario do BNG, gardou nun caixón os proxectos para construír as variantes que deixou preparadas e presupostadas o anterior Goberno do Partido Popular nos Peares-Canaval e Rubián e que si permitirían reducir o tempo da viaxe entre Lugo e Ourense”.
