Nos últimos anos a asociación conseguiu asentar esta tradición que se leva celebrando dende tempos inmemoriais. O seu obxectivo, na actualidade, é implicar á xente nova para que non se chegue a perder a tradición. “Nestes días estamos a traballar na recollida dos agucios para elaborar as fachas, tarefa na que están tamén a participar os máis mozos de Vilelos co fin de que vaian tomando contacto coa tradición, destacan desde a asociación organizadora.
A cita celebrarase o venres, 27 de setembro, a partir das 22:00 con pancetada e ás 00:00h será a procesión das fachas á cima do Castro da Besta. Á volta do percorrido acenderanse ás fachas máis longas que arderán ó tempo que se desenvolverán actuacións musicais de A Cadela Asasina, Searas e Catuxa Salom.
Vilelos é, xunto a Castelo, en Taboada, e Castro Caldelas, en Ourense, un dos poucos lugares de Galicia onde se conserva esta manifestación cultural.
A deputada, Iria Castro, destacou na presentación “a implicación da veciñanza para dar continuidade a esta tradición, que xenera un orgullo e un sentido de pertenza moi importante á hora de crear comunidade no rural” e lembrou “o compromiso da Vicepresidencia da Deputación de Lugo co tecido asociativo, que desenvolve un papel fundamental na dinamización cultural e social das parroquias”.
A festa de grande interese patrimonial e cultural, vinculada á Queima das Fachas que a parroquia taboadesa de Castelo celebrou o 7 de setembro, foi declarada BIC no ano 2018.
