A plataforma conta co apoio de Adegas do Saviñao, a Asemblea Local do BNG e PSOE-PSG O Saviñao, a colaboración e apoio doutros concellos afectados como Bóveda, Paradela, Monforte de Lemos,…e ADEGA. Ademais do apoio de cada vez máis afectados no sector agrario e turístico, polo que actualmente conta cunhas 900 alegacións ao proxecto actual, máis as que se están sumando desde Monforte de Lemos, Pantón e Nogueria de Ramuín (Ourense), que xusto abriu período de presentación de alegacións.
Pacto Fronte Eólicos reitera o apoio ao sector vinícola tan representativo e importante economicamente para a zona e denuncia a falta de transparencia na xeración de contratos nas mancomunidades. Lamentan tamén a falta de apoio por parte dalgunhas administracións públicas locais para facilitar esa transparencia e aseguran que analizarán circunstancias como “cambios de titularidade en propiedades susceptibles de ser interesadas na instalación de aeroxeneradores, ou edificacións auxiliares necesarias, feitas un ano e medio antes da publicación do proxecto” e anuncian que utilizarán os datos de carácter público rexistral para analizar as devanditas situacións.
Pola súa banda desde Segredos de Pantón informan de que o proxecto levará ao seu municipio unha rede de distribución de 28 kms de lonxitude e 108 torretas, pasando ao carón de moitas aldeas, pasando por riba do LIC Río Carabelos e a poucos metros da xoia do románico San Miguel de Eiré.
O procedemento para presentar alegacións por rexistro electrónico a este proxecto, segundo informan desde ADEGA é o seguinte:
1) Accede a reg.redsara.es e preme en “novo rexistro”.
2) Identifícate con sinatura dixital.
3) Introduce os datos de contacto e indica que se actúa en nome propio (interesado).
4) Marca que avisen do avance por correo electrónico e preme seguinte.
5) Marca código e nome do organismo. Neste caso: EA0040576.
6) Escribe en “asunto”:
En “Expón”:Que no Boletín Oficial do Estado no 198, de data 16 de agosto de 2024, se somete a información pública o Estudo de Impacto Ambiental e a solicitude de Autorización Administrativa Previa do Parque Eólico Neboreiro, de 45 MW de potencia eólica instalada e 9MW de potencia fotovoltaica instalada en inversores, e a súa infraestrutura de evacuación nas provincias de Lugo e Ourense, Código do proxecto Peol- FV-153. Que, en tempo e forma, polo presente e en relación co aludido anuncio, procédense a evacuar as alegacións contidas no documento apegado a esta solicitude.
En “Solicita”: Que tendo por presentadas estas alegacións, se lles dea o trámite oportuno e, en virtude do exposto, se proceda a resolver negativamente os procedementos de solicitude de autorización administrativa previa do Proxecto Eólico de referencia e a súa infraestructura de evacuación, considerando a tal efecto as afeccions ambientais concorrentes, así como o resto de consideración manifestadas no presente escrito.
7) Carga o documento de alegacións asinado dixitalmente e confirma os datos. Anexamos máis abaixo o documento a cargar.
8) Asina, envía e garda o xustificante!
