A presentación, que tivo lugar hoxe no Auditorio Municipal de Chantada, contou coa presenza do Concelleiro de Cultura de Chantada, Manuel Diéguez; a responsable da área de Cultura da Vicepresidencia da Deputación, Iria Castro; e Paulo Gómez e Sara Taboada da asociación promotora, a Asociación Cultural O Castañazo.
O Concelleiro de Cultura de Chantada, Manuel Diéguez, destacou o traballo da Asociación Cultural O Castañazo por seguir apostando por este Festival que é un referente na programación do outono no país, “O Castañazo Rock demostra que hai canteira para seguir celebrando o Festival. Desde o Concello de Chantada seguiremos colaborando económica e loxísticamente para seguir colleitando éxitos con esta cita que trae ao municipio a multitude de persoas e crea ambiente de festa na vila”.
Pola súa banda, Iria Castro valorou “o gran dinamismo da organización que involucra, de forma directa, a máis dunha vintena de mozas e mozos de Chantada, e que logrou consolidar o festival como un referente musical do outono” e lembrou o apoio “na colaboración continuada e estable que desde a área de Cultura mantemos co tecido asociativo na organización de festivais de pequeno e mediano formato para manter a oferta de música en directo en toda a provincia e propiciar escenarios para as bandas galegas”.
PROGRAMACIÓN: CONCERTOS E ACTIVIDADES PARALELAS DO FESTIVAL
Os concertos desenvolveranse, como é habitual, nas instalacións do Mercado Gandeiro. A apertura de portas farase os días 1 e 2, ás 19:00h para as 20:00h dar comezo aos concertos. Nesta edición contarase o venres 1 de novembro coas actuacións de Los Chikos del Maíz, Boikot, Zetak, Mondra, Quinkillada e Cool Nenas. O sábado, 2 de novembro, os concertos correrán por conta de Lendakaris Muertos, The Baboon Show, Lontreira, Dios Ke Te Crew, Boyanka Kostova. Entre concertos haberá música de DJ Sonora Balkumbiera. O Festival conta con zona de acampada gratuíta e roupeiro habilitados nos pavillóns dos colexios.
Ademais dos concertos organízanse actividades paralelas para dar ambiente a toda a vila. No Auditorio Municipal haberá exposición de traballos sobre O Castañazo, realizados polo alumnado dos diferentes centros de ensino. O 2 de novembro celebraranse os Cantos de Taberna, que comezarán ás 15:00h, partindo da Praza de Santa Ana, coa participación de 12 grupos que percorrerán 11 bares da vila.
Colabora cos Cantos de Taberna, o Entroido Ribeirao, que levará os seus personaxes no percorrido polos bares para poñer en valor esta emblemática tradición do Entroido. Ao redor das 18:00h prevese o remate dos Cantos de Taberna, aos que seguirá o pasarrúas de Mekanika Rolling Band.
Como actividades complementarias, como é habitual, contarase con magosto que se celebrará o 2 de novembro as 19:00 no Recinto do Festival. Mentres que o Ourizo Miúdo terá lugar nesa xornada, ás 11.30h no Auditorio Municipal de Chantada, onde crianzas de todas as idades poderán pasar unha mañá chea de música, teatro, castañas e diversión con Brais das Hortas.
Nesta edición recupéranse os Xogos Bravús que se desenvolverán na Praza do Cantón o día 1 de novembro nas categorías de Individual (comezo ás 16:00h.) e Equipos (comezo ás 17:00h.) Establécense as seguintes probas: Rebola Bolo, Lanzamento de Ourizo, Carreira de Leiteiras, Debulla Millo e Movemento de Marco.
Como novidade nesta 19 edición organízase a I Feira de Artesanía, que se celebrará na Praza do Cantón os días 2 e 3 de novembro. Os 11 postos participantes abrirán o 2 de novembro de 11:00 a 19:00h e o 3 de novembro de 11:00 a 14:00h. Nenas e nenos contarán no mesmo escenario con actividades infantís a cargo de Velaísca, o domingo en horario de mañá.
