En outubro tamén deron comezo dous obradoiros que se desevolven na Casa da Cultura de Ferreira. Por unha banda o Obradoiro de Costura Creativa, que ten lugar todos os venres de 17:00h a 19:30h e, por outra, o Obradoiro de Scrapbooking, que se leva a cabo todos os luns de 18:00h a 20:00h.
O 23 de outubro comezou unha actividade que goza de grande éxito en Pantón o Obradoiro de Técnicas de Traballo Intelectual. Este obradoiro comezou como un taller de memoria para adultos, e a actividade foise adaptando ás persoas participantes como comenta o alcalde, José Luis Álvarez, “viña xente de 60 anos en diante e fomos vendo que a maioría das persoas que acudían non tiñan problemas de memoria, se non perda de habilidades por falta de uso”.
Neste mes un grupo de veciñas e veciños de Pantón subiuse ao autobús do teatro para viaxar a Santiago de Compostela a ver a obra “Terceiro Acto” no Salón Teatro, dentro do Programa de mobilidade do Centro Dramático Galego. E fíxose a Ruta do Xanarteiro para coñecer paisaxes e recursos do municipio.
O 31 de outubro prográmase o Samaín Familiar. Desde as 20:00h na Praza do Concello, se o clima o permite, contarase con busca do tesouro. Unha cita de medo para pasar en familia con agasallos para os tres primeiros. Outra cita propia desta época lévanos ao 9 de novembro para celebrar Magosto Popular ás 18:00h na Praza do Concello con actuación musical.
A programación cultural de novembro no Concello de Pantón complétase con tres citas teatrais gratuítas para todos os públicos que se desenvolverán na casa da cultura ás 18:00h. O 10 de novembro, o grupo Viravent porá en escea a obra “Copacabana”. O 17 de novembro o grupo do Hospital de Lugo representará “Asasinato na tenda de roupa” e o 24 o grupo Loia Producións representará a obra “María Visitación Consolación Amadora”.
Toda esta actividade complétase coa exposición que se pode visitar ata o 29 de novembro no segundo piso da Casa da Cultura. Trátase da mostra fotográfica, Ingredientes de cocktails macrofotografía.
