Coincidindo co outono, no IES Daviña Rey organízanse actividades relacionadas cos cogomelos e bautizadas no seu conxunto como IV Trimestre Micolóxico no Daviña. Como comezo deste proxecto educativo, o IES Daviña Rey abriu as súas portas para acoller ós nenos/as dos colexios de Monforte de Lemos: Torre de Lemos, A Gándara, Escolapios, Ferroviario e Colexio Novo. O alumnado que visitou o centro gozou dunha completa exposición de cogomelos montada na biblioteca do instituto.
Os fungos, que foron recollidos polo alumnado do centro nos arredores das súas vivendas, tanto comestibles coma tóxicos, conformaron a exposición.
A actividade foi desenvolvida coa axuda de Carlos Pérez, presidente da asociación Lactouros, que lles deu á cativada información sobre os diferentes cogomelos. Ademais, aproveitouse a ocasión para realizar unha actividade organizada polos alumnos/as do Ciclo Superior de Educación Infantil que consistiu na elaboración dun mural pintado con tizóns das cociñas de leña.
Para continuar coas actividades incluídas neste trimestre micolóxico, os propios alumnos do centro o vindeiro día 4 de novembro protagonizarán unha saída para buscar cogomelos e poñer en práctica o aprendido nunha charla anterior que correrá de novo a cargo do presidente da asociación Lactouros.
E xa a finais de novembro, haberá unha nova xornada micolóxica centrada na exposición Wood Wide Web. A rede que dá vida ó planeta cedida pola da Asociación Amabul que inclúe paneis informativos e diversos xogos de mesa. A ANPA do centro colaborou tamén convocando un concurso de fotografía micolóxica.
