A actividade, baixo o título de “Gustaríache ser olivareiro por un día na Ribeira Sacra?”, está organizada por Enoturismo de Galicia e vense facendo dende o 2014 segundo nos conta a súa xerente, Amparo Montenegro.
Segundo nos explica Amparo, está tendo moi boa aceptación e “a xente que adoita vir é maioritariamente de Galicia, aínda que tamén veñen doutras comunidades como Castela-León, Asturias, Madrid… dependendo de como cadren as datas de organización cando se recollen as olivas”.
A actividade faise en Quiroga e consiste nunha viaxe interactiva para coñecer de onde vén o aceite e como se coidan as oliveiras. Primeiro de todo é dar un paseo polas olivareiras explicando as características das árbores, a continuación coñécese e partícípase tamén no vareo, no xeito antigo e como se varea agora de forma mecánica. E despois vaise á almazara onde se coñece o proceso de elaboración, véndoa en pleno funcionamento dende o esmagado da oliva ata a súa decantación. Finalizarase cunha cata de aceite.
A actividade continúa coñecendo un muiño antigo, nas Farrapas de Bendilló, para saber como se facía o aceite antigamente. Neste lugar é onde se fai a demostración que cada ano forma parte da Mostra do Aceite de Quiroga. E para rematar, o grupo de participantes da actividade coñecerán Armaior, unha empresa que elabora utensilios de cociña e de decoración a partir de madeira de oliveira. Visitarase o obradoiro e unha tenda que teñen na Toca, a carón do casco urbano de Quiroga.
A actividade está programada para os días 2 e 3 de novembro en horario de 10:00 a 14:00 h. Se alguén está interesado hai que contactar no correo info@enoturismogalicia.es ou no teléfono 676 101 649.
