O peche do Mercado de Outono tivo lugar o sábado a partir das 8 e media da tarde e fíxoo cunha degustación de produtos de outono e viños da Ribeira Sacra acompañados de música en directo, co concerto acústico do grupo monfortino Segunda Parte. Esta actividade encheu de público o espazo dos Mercados da Praza de Abastos, e supuxo un exitoso colofón a toda a xornada.

O Mercado de Outono, organizado polo Concello de Monforte, contou con afluencia constante de público ao longo de todo o día, que puido adquirir produtos de outono ofertados finalmente por 15 postos de venta directa. Eses priodutos foron castañas, cogomelos, noces, mel, viños… así como outros elaborados cos mesmos: doces, marmelos, licores….. e tamén se puideron mercar embutidos e queixos galegos, xabóns, cosmética natural ou artigos únicos como lámpadas de cabazas ou bixutería e complementos.

A organización amosa a súa satisfacción tamén porque todas as actividades do programa completaron o seu número de prazas. Dende o Obradoiro de decoración de cabazas e estampados do outono para nenos e nenas, pasando polo Pintacaras tenebroso, e o Contacontos coa narradora Ángeles Goás titulado “Caldo con unto e ósos de defunto”, ata o Showcooking Outonal que repartiu máis de 100 tapas elaboradas con setas, castañas e outros produtos de tempada.