O pasado 16 de novembro tivo lugar no Hotel Vilaseco de Chantada a entrega do ‘Billó de Ouro 2024’, evento que xuntou a unhas cen persoas. Entre os asistentes estiveron os alcaldes dos Concellos de Chantada e Taboada, Manuel Lorenzo e Roi Rigueira Agromartín, respectivamente, ademais de varios concelleiros dos concellos da comarca e Javier Campelo, presidente do GDR Miño Ulla.
Os discursos dos alcaldes e do gran Porto, o organizador, foron agarimosos e o do premiado, Iñaki Castiñeira, especialmente emotivo, lembrando as orixes da súa empresa, A Túa Xanela, que naceu como empresa familiar e que medrou ata ser o que é hoxe consolidándose por Galicia dende a Comarca de Chantada.
“Non podemos estar máis agradecidos de que este ano, no seu aniversario número 25, pensaran no noso director para recibir o Billó de Ouro”, comentan dende A Túa Xanela.
O BILLÓ DE OURO
O Billó de Ouro é un premio outorgado polos concellos da Comarca de Chantada (Taboada, Chantada e Carballedo) e que se vén realizando dende 1997. Desde o ano 2004 outórgao a Sociedade Cultural e Gastronómica Luso-Galaica, fundada para promover e potenciar a cultura e gastronomía galega e portuguesa. Billó é a forma local para nomear a castaña asada e sen casca ou bulló. En portugués, por outra banda, bilhó é unha castaña asada e sen casca.
As primeiras edicións deste encontro xurdiron arredor da festa da castaña, e de aí o nome e tamén que o primeiro premiado fose un empresario das castañas.
