A apertura de Gourmet Gallego congregou a numerosos asistentes, entre eles clientes, provedores, amigos, e todo o equipo de Gourmet Gallego. Para a ocasión, ofrecéronse degustacións de viños, táboas de queixos e outros produtos gourmet, reflectindo a excelencia e o compromiso da tenda coa gastronomía galega.

Gourmet Gallego nace da paixón e dedicación de Sara e Manuel Fernández Conde, un matrimonio comprometido coa revalorización da gastronomía e dos produtos galegos. Ambos, con raíces profundamente ligadas ao campo e a produción local, decidiron crear un espazo que combine tradición e excelencia, achegando os mellores produtos galegos aos consumidores tanto locais como nacionais.

Manuel Fernández destaca “Queremos poñer a Galicia na boca de todos, ofrecendo momentos inesquecibles coa mellor selección de produtos gourmet da nosa terra. Desde Monforte, buscamos non só ofrecer produtos, senón tamén compartir a esencia de Galicia”.

Durante a súa intervención, o alcalde, José Tomé, destacou a importancia deste tipo de establecementos gourmet para promover os produtos de calidade galegos, revitalizar o comercio e fortalecer a economía local. “É un orgullo ver como a xente se achega, degusta e leva consigo un pedaciño de Galicia”, sinala Sara.