Quen foi Alcalde durante 26 anos fixo un repaso do seu tempo no Concello no que se elaborou o Plan Xeral, a rede de saneamento, a construción de traídas de auga novas, a posta en marcha do Centro de Atención a Maiores, a construción dun cámping e de dous museos; así como a adquisición dun camión de bombeiros ou dun camión do lixo. Despois deste tempo e na idade de xubilación aseguran deixar o relevo a xente máis nova, “Chegou o momento de dar un paso a un lado na política. É unha filosofía que tiñamos de servizo público os dous e no momento no que nos xubilamos debemos deixar que outra xente máis nova continúe o labor que nos viñamos desenvolvendo”, así explicou o rexedor a decisión que veñen de adoptar.
“Queda en boas mans o Concello, xente con moita experiencia que leva con nós moitos anos e que sabe perfectamente rexer o Concello. Darán continuidade ás liñas de traballo que viñamos desenvolvendo”, avanzou.
Pola súa banda, Tomé Roca valorou o traballo desenvolvido ao longo destes anos polos dous e desexoulles unha “xubilación moi longa, que desfrutedes nova etapa xunto á familia, pero non deixedes de estar”.
Este anuncio fíxose despois de que Miguel Sotuela asinase co presidente da Deputación, José Tomé, un acordo de colaboración polo que a institución provincial achega de 118.000€ para desenvolver un conxunto de actuacións que mellorarán os servizos e dotacións públicas deste municipio. Os proxectos teñen un orzamento total de 182.211,71 €€, dos que o Concello achega a cantidade restante.
En concreto, vaise facer a instalación eléctrica do cámping, a optimización enerxética das instalacións do alumeado público, adquirir programadores astronómicos para o alumeado público e farase un conxunto de melloras na casa consistorial.
Así mesmo, pavimentaranse os camiños na Cabarca e Piñeira, e mellorarase o camiño de Filgueiro aos Vilares. Tamén se vai adquirir un compresor para a ETAP, unha rozadora lateral para a prevención de lumes forestais e un remolque plataforma para o transporte de maquinaria. Ademais de adquirir dúas parcelas no termo municipal de Ribas de Sil.
