O Concello de Sober vén de anunciar catro concursos para fomentar a participación da veciñanza no Nadal. Un deles anima a decorar locais comerciais, outro a poñer beléns e outros dous á creación literaria e gráfica.
Un dos concursos é o Certame de Poesía Infantil “Nadal 2024” (fase local) e está convocado dende a Biblioteca Pública de Lugo co patrocinio da Consellería de Cultura, Lingua e Xuventude da Xunta de Galicia convoca. Destinado a novos creadores e creadoras ata 16 anos e con premios para 3 categorías: categoría A, ata 8 anos; B, de 9 a 11; e C, de 12 a 16. As bases están na súa páxina web.
Outro de carácter creativo-gráfico é o ‘Concurso de Postais’. Trátase de debuxar postais de Nadal e tamén con varias categorías: A, ata 8 anos; B, de 9 a 11 anos; C, de 12 a 16; e D a partir de 17 anos. Os premios son un diploma e lotes de libros.
E outros 2 certames creativos animan á elaboración de beléns e a decorar establecementos comerciais para ambientar o concello nestas datas. Poden participar persoas físicas ou xurídicas, de xeito individual ou colectivo, e tanto os beléns como as decoracións teñen que estar dentro do municipio. Os premios para os mellores consistirán en vales para gastar consumindo no comercio loca.
O prazo para presentarse a concurso remata o 20 de decembro e para participar hai que pasar polo Departamento de Cultura e presentar os impresos de solicitude. As bases destes 2 concursos están na páxina web do Concello de Sober.
