O XV Concurso de Tapas da Guimaralia, encontro co ‘tapeo’ que organizaba o Concello da Pobra do Brollón do 29 de novembro ao 5 de decembro, rematou con preto de 2.000 pinchos vendidos entre os seis locais participantes.

No concurso deste ano recolléronse 205 tarxetas de votación válidas, seladas polos seis establecementos e nas que todas e todos os participantes escollían o seu petisco favorito. Tendo en conta, pois, que os 3 premios escóllense en votación popular, as tapas máis votadas foron: en primeiro lugar, a tapa ‘Nadie a leva con patacas do Agro’ do Primeiro de Maio; en segundo lugar, ‘Solombo no souto dos Gandarós’, da Salanova; e a terceira gañadora, ‘Solombo en salsa de queixo azul con verduras e redución de Val do Frade’ do Avenida.

Entre todas as persoas participantes na votación, sortearase unha noite con circuíto termal no Hotel Iberik Augas Santas de Ferreira de Pantón. O sorteo realizarase na Casa da Cultura ‘Olga Novo’ dentro dos actos dos Reis de 2025, así como a entrega do premio do sorteo e dos diplomas acreditativos aos tres establecementos gañadores.