Coincidindo coa clausura, inaugurábase a IX edición que toma o relevo do anterior, tamén financiado pola Consellería de Emprego, Comercio e Emigración, que inviste algo máis dun millón de euros en ambas iniciativas.
Deste doble acto que tivo lugar no salón de plenos da Casa da Cultura, participaron o delegado territorial da Xunta de Galicia, Javier Arias, a directora provincial de Emprego, Carmen José López, o alcalde de Chantada, Manuel Lorenzo Varela, o de Carballedo, Julio Yebra, o alcalde de Taboada, Roi Rigueira e Diego Otero como concelleiro de Obradoiros de Chantada, ademais das 40 persoas participantes nos dous obradoiros.
Estas persoas reciben formación durante 12 meses nos módulos de Xardinaría, Albanelaría e Atención Sociosanitaria, que presentan unha elevada demanda no mercado laboral. De feito as persoas do módulo de Atención Sanitaria xa atoparon traballo na Residencia de Carballedo. Este módulo inclúe formacións e actividades prácticas que tamén se desenvolven no Fogar Residencial e Centro de Día da Barrela, porque o módulo céntrase na atención a persoas dependentes.
Os outros módulos centraron a actividade no Parque Eloísa Rivadulla co acondicionamento dos baños públicos e a creación dunha zona pavimentada no Parque, ademais do seu axardinamento, a creación dunha pequena zona verde na Avda, de Lugo e o mantemento doutros espazos verdes da vila.
Nesta nova edición os módulos de Xardinaría e Albanelaría executarán unha zona de plataforma única no parque Eloísa Rivadulla e acondicionarán miradoiros no paseo fluvial. Realizaranse tamén traballos de conservación de xardíns e zonas verdes e creación de novos espazos destas características no municipio.
“Desde o Concello de Chantada apostamos pola creación e búsqueda de emprego, ofrecendo novas oportunidades formativas e laborais para as persoas desempregadas. Por iso, ademais de promover estes obradoiros tamén contamos co Programa Integral de Emprego do que tamén vén de comezar unha nova edición”, explica o alcalde de Chantada, Manuel Lorenzo Varela.
