O IES A Pinguela vén de presentar ao entorno produtivo, alumnado e profesorado o novo “Espazo de Tecnoloxía Aplicada” e a nova maquinaria do Ciclo Medio de Calzado e Complementos de Moda adquirida co apoio da Consellería de Educación por medio do programa Techno Shoemakers e outros de apoio á adquisición de material industrial. O investimento en maquinaria, nalgúns casos de última xeración, supera os 65.000 euros.
Ademais da dirección, alumnado e profesorado, estiveron presentes no acto os xerentes das empresas de calzado de Monforte de Lemos: Curtidos Galaicos (CURGAL) e Calzados Losal. Nos dous casos valoraron moi positivamente o novo equipamento para as aulas e dende a dirección agradecéronlles “o seu apoio na formación do alumnado de FP Dual como no permanente acompañamento das actividades dos nosos ciclos formativos”.
CONVERSIÓN DE AULAS EN ESPAZOS DE TECNOLOXÍA APLICADA
A actuación do Programa de Cooperación Territorial “Conversión de aulas en espazos de tecnoloxía aplicada” execútase a través dos créditos que se distribúen ás Comunidades Autónomas e enmárcase na compoñente 20 do Plan Estratéxico de Impulso da Formación Profesional, do Plan de Recuperación, Transformación e Resiliencia.
O obxectivo da mesma é a conversión de aulas en espazos que se aproximen a contornas de traballo, coa incorporación de recursos propios de cada sector produtivo, mediante simuladores e outros elementos tecnolóxicos. O IES A Pinguela participou nesta actuación pola que lles foi transferida unha partida económica de 55.000 € para a súa posta en marcha.
