O delegado territorial da Xunta en Lugo, Javier Arias, e o piloto Eduardo Iglesias visitaron aos nenos e nenas ingresados na área de hospitalización do servizo de Pediatría do Hospital Universitario Lucus Augusti para entregarlles agasallos de Nadal.

Iglesias respondeu ademais a todas as cuestións dos cativos sobre a súa vindeira participación no Rally Dakar 2025, unha proba na que competirá por sexta vez, e brindoulles a oportunidade de subir nunha mini moto eléctrica que fixo as delicias dos máis pequenos.

O monfortino Eduardo Iglesias é o único piloto galego que competirá no próximo Rally Dakar, que comezará o vindeiro 3 de xaneiro en Arabia Saudita.

Iglesias conta coa colaboración da Xunta a través da Axencia de Turismo de Galicia, para usar esta proba como escaparate internacional das bondades da comunidade como destino, e da Secretaría Xeral de Deportes, en recoñecemento ao piloto como referente do deporte galego.

Na visita estiveron tamén presentes o xerente da área sanitaria de Lugo, A Mariña e Monforte de Lemos, Ramón Ares, e a directora de Atención Hospitalaria, Montserrat Ortiz, entre outros membros do equipo directivo da área.

Eduardo Iglesias e Javier Arias, HULA / Delegación territorial