Seguindo a tradición, este 3 de febreiro pola mañá celebrouse a eucaristía do San Blas que contou coa participación de numerosos veciños e veciñas devotas deste santo.
A Tenente de Alcalde do Concello de Monforte, Gloria Prada, o concelleiro de Obras e Servizos, José Luis Losada, e as concelleiras de Muller e Igualdade, Margarita López, e Consumo, Regina López, participaron dos actos litúrxicos en representación do Alcalde de Monforte de Lemos, José Tomé Roca, quen non puido acudir ó acto por ter outros compromisos institucionais.
Tal e como é costume no Val de Lemos, durante a celebración levouse a cabo a bendición das roscas e das cintas dos monfortinos e monfortinas presentes na celebración.Tras a bendición, tivo lugar unha procesión coa imaxe do San Blas polo exterior do templo.
A Policía Local do Concello de Monforte estableceu un dispositivo especial de tráfico que garantiu que a circulación e os accesos a igrexa, e o acto desenvolveuse con total normalidade.
