As piragüistas do Club Quixós, Noa Díaz e Ximena Prats, recibirán a “Medalla do COE” en recoñecemento aos éxitos deportivos acadados o pasado ano. A noticia foi recibida polas monfortinas a través dunha carta persoal asinada polo propio Presidente do Comité Olímpico Español. Ademais, o máximo dirixente desta institución felicítaas “por este merecido galardón, reflexo do seu compromiso, esforzo e excelencia”.
A data de entrega da devandita distinción seralles comunicada no seu momento pola Real Federación Española de Piragüismo.
A comunicación persoal recibida colleunas de sorpresa ata tal punto que o técnico do Quixós, Santi Díaz, comentaba: “nin pola imaxinación pensabamos nesa medalla. De feito, pensei que se trabucaran”.
UN 2024 ESPECTACULAR
Ademais do amplo medalleiro acadado a nivel galego co seu Club Quixós, Noa e Ximena tamén tiveron relevantes premios a nivel nacional e internacional o pasado ano. Concretamente, foron o bronce no Campionato do Mundo de augas bravas, celebrado en León na modalidade de patrullas C-1 co trío no que tamén estaba a vasca Eider Larrañaga.
Sumado ao anterior cómpre salientar que Noa acadou o segundo posto a nivel estatal na modalidade de kaiac cross e décima no Campionato Europeo.
E precisamente polos devanditos éxitos deportivos, a monfortina recibiu en outubro de 2024 o premio de deportista do ano na XVIII edición dos Premios El Progreso do Deporte Lucense.
