As Xuventudes Musicais, en colaboración do Concello de Sober, retoman a organización de concertos nos que se lle dá un protagonismo especial á música de cámara. Nesta ocasión, organizan para o vindeiro venres, 28 de febreiro, un concerto do Dúo Métis ás 19:00 h. no salón de actos do Centro Sociocultural.
Este dueto, segundo informan fontes do concello, “convídanos a embarcarnos nunha emocionante viaxe a través dunha selección de melodías francesas, españolas e arxentinas dos séculos XIX e XX. Este programa destaca a rica herdanza da melodía francesa, así como a exuberancia e orixinalidade das tradicións españolas e suramericanas”. E para recrear esta viaxe, os músicos recorrerán a tres grandes compositores: Gabriel Fauré, Manuel de Falla e Astor Piazzolla con “sonoridades íntimas da música de salón ata a enerxía cálida da canción de café”.
DÚO MÉTIS
O Dúo Métis está composto por Luis González Garrido e Antoine Guerrero, dous músicos de países diferentes con traxectorias artísticas similares. Tras cruzarse os seus camiños en 2017 en Sevilla, foi en 2021 en París onde crearon este dúo. A inicios de 2022 foron seleccionados por Jeunes Talents (Francia), institución que os programou en multitude de ocasións, sendo o primeiro grupo en ser programado en dúas datas no Festival Européen Jeunes Talents (Francia).
Actuaron en Francia e España con diversos repertorios para festivais de música, concertos pedagóxicos e programas como Lles Concerts de Poche. Fixeron o seu debut no “Palau da Música Catalá” de Barcelona o 30 de setembro de 2023 e tamén tocaron en festivais como o Ciclo de Música de Cámara de Utrera, o ciclo Follas do Álbum de Badaxoz, o Festival “Lles Classiques du Prieuré” (Francia) ou Musique en Ubaye (Francia).
