En horario de 16 a 19h., no local do Sindicato Labrego en Chantada (Rúa Emilia Pardo Bazán, 11-Baixo), este 7 de marzo abordarase a Intervención Sectorial Vitivinícola (ISV 2024-2027). Trátase de fondos da Política Agraria Común (PAC) que financian, entre outras intervencións, a reestruturación e reconversión de viñedo e a colleita en verde.

As palestras desenvolveranse en distintos concellos da Ribeira Sacra lucense desde o mes de marzo deica a vendima, co obxectivo de crear un espazo no que debater sobre o futuro do sector do viño nesta Denominación de Orixe (DO). “Consideramos fundamental achegar en primeiro termo información sobre aspectos que neste momento cobran especial relevancia: axudas, contratos, custes de produción, o mercado do viño tinto… Así, os dous temas cos que iniciamos este ciclo gardan relación coas axudas porque unha parte delas están a piques de convocarse e outras xa están convocadas”, sinalan.

A segunda xornada do ciclo “O futuro das persoas viticultoras na Ribeira Sacra” terá lugar achegándose a vendima. Neste espazo abordaranse cuestións como a Lei de Cadea Alimentaria aplicada ao sector vitivinícola, nomeadamente a obriga de formalizar nun contrato por escrito a entrega de uva ás adegas e o Modelo de contrato da Interprofesional do Viño.

Dende o SLG reiteran que un plan para salvar á Ribeira Sacra, require dunha mesa de traballo na que tódolos axentes implicados poñan en común análises e propostas. Agardan que o ciclo “O futuro das persoas viticultoras na Ribeira Sacra” forneza un espazo onde traballar solucións para esta denominación de orixe, cuxo valor esténdese moito máis aló da propia produción vitivinícola, sendo elemento esencial da configuración paisaxística da comarca e vertebrador de numerosas actividades económicas para a poboación local, que van dende o turismo ou a prestación de servizos especializados até a propia fixación de poboación neste territorio de singular valor cultural e medioambienta