O centro formativo IES Daviña Rey está a realizar este mes, concretamente ata o día 20 de marzo, unha campaña de reserva e admisión para alumnado que o vindeiro curso queira matricularse na ESO ou en BAC. Ademais, os días 18,19 e 20 impulsa unha feira para dar a coñecer os Ciclos Formativos de FP que ofrece. Neste caso, os diferentes departamentos amosan, directamente ou a través de obradoiros, o material do que dispoñen e tamén o resultado dos seus traballos.
Segundo nos comenta a directora, Raquel Aira, “outros anos organizabamos xornadas pero vimos que este modelo é máis atractivo”, e engade “a finalidade desta feira é que os rapaces poidan manipular material que hai en cada ciclo e que coñezan tamén o resultado dos traballos realizados polo alumnado”. De feito, os propios alumnos e alumnas fan de guías dos visitantes para darlles a coñecer os ciclos e os resultados acadados durante o curso. “Están moi orgullosos de ensinarlles o que fan”, comenta finalmente a directora.
Para dar a coñecer esta 1ª Feira de FP do IES Daviña Rey, o propio centro envioulles información do encontro de portas abertas informativo e práctico a colexios de Monforte e doutros concellos da contorna como A Pobra do Brollón, Bóveda, O Saviñao, Sober e Quiroga. Con esta invitación espérase a visita de alumnado de 6º de Primaria e de 4º de ESO.
COMO SE DAN A COÑECER OS CICLOS?
Raquel Aira, a directora, convida a coñecer o centro e as súas opcións de FP e aproveita para explicarnos brevemente o que atopan as rapazas e rapaces que se achegan estes días ao IES Daviña Rey entre as 10:00 e as 13:00 h.
Nos ciclos de Automoción (Mantemento e Electromecánica de vehículos), por exemplo, poderán verse 2 coches de competición de Rally e tamén a moto do piloto Eduardo Iglesias que correu o último rally Dakar. Nalgún momento estivo tamén o propio Iglesias para falar coa rapazada. Así mesmo, tamén se poden coñecer dispositivos de diagnose electrónica.
No espazo do ciclo de Coidados auxiliares de enfermería os e as visitantes poden ver unha exposición de maquetas relacionadas co corpo humano, coñecer e manipular instrumental sanitario e participar nun obradoiro de primeiros auxilios e noutro de saúde bucodental.
Polo que respecta á Atención a persoas en situación de dependencia e Educación Infantil exponse información sobre sistemas alternativos e aumentativos de comunicación como o bliss ou o braille; tarefas de costura básicas; elaboración de sobremesas saudables; axudas técnicas para a mobilidade persoal, para o manexo de produtos e para o coidado persoal de persoas dependentes, documentación do proceso educativo en educación infantil a través de imaxes e recollida de expresións orais, a creación de materiais didácticos con elementos da natureza e de refugallo, creación de materiais sensoriais para bebés con recursos da vida cotiá, ou manipulación de materiais pedagóxicos específicos, como o Montessori ou o Waldorf.
Electricidade e electrónica. Nese ciclo hai exposicións e demostracións de impresoras 3D, da cortadora láser que empregan no centro e de drons que se usan en telecomunicacións.
Nos ciclos de Telecomunicacións e Ciberseguridade aqueles que se achegan ao IES Daviña Rey poden coñecer un “Reloxo de viño” e participar, entre outras opcións ofertadas, nun obradoiro de programación mediante bloques e outro de “Hackeo” dun sistema de produción dunha fábrica.
VISITA INSTITUCIONAL
Esta mañá a Tenente de Alcalde, Gloria Prada, acudiu á feira en representación do Alcalde de Monforte. Estivo acompañada do Concelleiro de Medio Ambiente, Obras, Medio Rural e Servizos, José Luis Losada; e visitaron os distintos stands que forman parte da mostra xunto á Directora do Centro, Raquel Aira, profesores e alumnos do IES Daviña Rey.
