Este venres 18 de abril bota a andar a XLIII Feira do Viño de Quiroga, e faino xa con interesantes actividades e unha oferta musical para animar a primeira noite grande desta celebración vitivinícola que non lle ten medo á chuvia. “Temos todo preparado, carpas por todos os lados, así que a chuvia non é escusa para non vir a Quiroga a desfrutar cos nosos produtos e cos nosos viños. A estas alturas do ano temos unha boa temperatura polo noso clima e contamos con moita xente que nos visita. Durante estes tres días a celebración festiva esta garantida en Quiroga”, asegura o alcalde, José Luis Rivera.
Esta primeira xornada destaca pola cata de espumosos, que se desenvolve na Praza da rúa Lago, cunha cita pola mañá e outra ás cinco e media da tarde. Tamén o acto de homenaxe aos precursores da Feira do Viño de Quiroga que terá lugar ás 19:30 h. na Casa da Cultura e a posterior inauguración dunha exposición gráfica das primeiras edicións da feira na Casa da Cultura.
Días de exaltación e recoñecemento como explica o alcalde, “Como todo o que temos en Galicia é importante que a xente saiba o que hai detrás de cada cousa e o traballo que leva elaborar estos produtos porque iso non se ve,… a xente que anda nos viñedos, nas oliveiras ou nas colmeas. Iso dá moito traballo ao longo do ano e é de xustiza recoñecelo. Máis neste caso que falamos das orixes, dos precursores desta cita.”
Ás 21:00 h. abriranse as casetas das 13 adegas participantes no recinto feiral: Alma das Donas, Algueira, Atrium Vitis, EDV Viticultores, Alvaredos-Hobbs, Lar de Ricobao, Rectoral de Amandi, Casa de Outeiro, Val de Quiroga, Adega Gullufre, Pazo de la Cuesta e Adamare Wines e Adega Salvadur de Vilachá. Dende esa hora, e ata entrada a madrugada, o recinto feiral –cuberto por unha gran carpa– estará amenizado coa actuación do grupo local Mario Colomán & The Clocks Band e a disco móbil Eme.Music.
No stand de información estará a camiseta oficial que, co lema “Quiroga é un viño”, promociona esta cita, “O slogan de Novoneyra para a Feira do Viño tivo unha repercusión enorme. Esta invitación tivo unha gran aceptación, foi un acerto e tivemos que encargar máis para os días da Feira”, asegura Rivera.
O sábado pola mañá, aproveitando a apertura de postos ás 11:00 h., dará comezo a Feira co Equipo de Goberno do Concello de Quiroga recibindo ás bandas que participarán no XVI Certame Celtibérico de bandas de gaitas “Memorial Muíño”. Este encontro comezará ás once e media da mañá co desfile de bandas pola rúa Real ata a praza de España onde terá lugar a actuación e o concurso de bandas.
Ás 17:00 h. a música da charanga ‘CLK’ amenizará a xornada de tarde no recinto feiral ata o esperado momento do pregón, ás 20:30 h. que nesta edición correrá a cargo do ex xogador de baloncesto, Fernando Romay. Sobre o pregoeiro o alcalde asegura que “a posibilidade de contar con Fernando Romay para o pregón saiu dunha conversa cun amigo común. Propúxoselle e aceptou encantado, estou seguro de que acertamos de pleno co pregoeiro”.
A presentación será guiada polo xornalista quirogués da Radio Galega, Carlos Julio González, que tamén fará entrega dos premios á gañadora do concurso do deseño do cartel da feira do viño 2025, Laura Maquieira González, ao establecemento gañador do XIII concurso Val de Quiroga de Tapas e ao representante da camiseta gañadora do concurso da Feira do Viño deste ano.
De seguido, a partir das 21:00 h., o grupo “La banda de ayer” lembrará a mellor música pop e rock dos anos 80 e 90, e unha actuación sorpresa que non desvelou o concello polo de agora, será a encargada de animar ao público das 22:00 ás 00:00 h.
O domingo, o grupo de gaitas local O Recanto será o responsable da alborada para ir abrindo as casetas das adegas ás 11:00 h. e ás 13:00 h. será a quenda da Banda de música de Antas de Ulla, agrupación musical que fará un pasarrúas e animará o recinto da feira. Esta banda chega á Feira do Viño grazas ao programa Tradigalu que impulsa a Área de Cultura da Vicepresidencia da Deputación de Lugo.
