Segundo Por Chantada nas dúas lexislaturas pasadas, o concello de Chantada recadou 600.000€ co catastrazo, ao que se engadirían as anualidades cobradas con carácter retroactivo. “Uns ingresos que viñeron marcados por unha reforma do ministro Montoro e que foron decisivos en Chantada para poder facer fronte no seu momento ao plan de axuste e á débeda que tiña o Concello de Chantada, que estaba tecnicamente quebrado”, explican desde Por Chantada.
Nesta lexislatura explican que unha empresa tamén fixo traballos catastrais que afectaron, principalmente a núcleos rurais onde fincas de patacas ou a barbeiro pasan a seren consideradas solares, “pasando a pagar agora IBI urbano e non rural multiplicando a carga impositiva nas aldeas”.
Agora, Por Chantada alerta dun novo catastrazo coa colaboración entre o concello e a empresa Cartografía e Medicións S.L. “Consideramos que houbo un incremento importante da presión fiscal e dos impostos nas últimas lexislaturas con especial incidencia no medio rural (IBI, Catastro, lixo…), en canto os servizos e as infraestruturas distan anos luz da media europea. Isto só favorece que as parroquias queden sen xente”, aseguran.
Lamentan desde Por Chantada que o rural pague impostos e pareza abandonado polo concello, “que bonifica impostos no casco antigo ou no Polígono, mais non ás granxas ou á viciñanza que aposta pola aldea”. A este respecto lembran que Interior Galego Vivo impulsara unha moción con medidas para unha fiscalidade rural que se remitiu ao Congreso e ao Senado sen resultados.
