Nun acto celebrado este luns pola mañá en Quiroga, no que participaron o deputado do BNG no Congreso, Néstor Rego, o alcalde da Pobra do Brollón, Xosé Luís Maceda, o segundo tenente de alcalde de Quiroga, Xosé Manuel Fernández, e o deputado no Parlamento galego, Iago Suárez, o voceiro da formación en Monforte, Emilio Sánchez e a responsábel comarcal, Rosana Prieto, a organización nacionalista insiste na necesidade de acometer o arranxo do firme e o desdobre da vía alí onde fora posible.

Deste modo o BNG visibiliza a situación de abandono da N-120, “Falamos dunha infraestrutura fundamental para a comunicación e o desenvolvemento económico do Sur de Lugo, especialmente tras a continua perda de servizos ferroviarios que vimos sufrindo nos últimos anos” denuncia Néstor Rego ante os medios.

Un dos principais focos de preocupación sinalados polos representantes do BNG foi o tramo entre Quiroga e Pantón, en que destacan puntos especialmente perigosos, como os coñecidos tramos da Labrada e de Pantón. “Son zonas onde o estado do firme, as curvas pronunciadas e a falta de medidas de seguridade aumentan o risco de accidentes graves” alerta Néstor Rego.

A formación nacionalista incidiu en que non é suficiente cun simple parcheo ou con actuacións superficiais e parciais. “É necesario un investimento serio e unha planificación que resolva dunha vez por todas as graves deficiencias desta estrada. Reclamamos a reparación integral do firme en todo o tramo galego da N-120, e o desdobre da vía alí onde sexa técnica e territorialmente viábel”, demanda Rego.

O desdobre, apunta o deputado do BNG. permitiría mellorar a capacidade da estrada, reducir a sinistralidade e adaptar a infraestrutura ás necesidades actuais de tráfico. “Levamos anos sufrindo o deterioro progresivo da N-120 mentres vemos como noutras zonas do Estado si se executan investimentos importantes. Galicia merece un trato digno tamén nas súas infraestruturas” denuncia o deputado nacionalista.

O BNG lembra que o Ministerio de Transportes anunciou que as obras de reparación da N-120 comezarían en maio de 2025. Non obstante, a formación advirte de que este tipo de anuncios xa foron realizados en anteriores ocasións sen que se concretasen en actuacións reais e efectivas.

BNG N-120 / BNG congreso

Así, a organización nacionalista esixe ao Goberno que priorice de maneira real a modernización desta infraestrutura vital para o territorio e que non se limite a accións parciais que non resolven o problema de fondo.

A perda de frecuencias ferroviarias agrava a dependencia da N-120

O BNG pon de manifesto que a importancia da N-120 se viu aínda máis incrementada pola perda progresiva de servizos ferroviarios na zona nos últimos anos, unha situación que agrava a dependencia da estrada para a mobilidade das persoas e o transporte de bens. “A desaparición de frecuencias de tren deixounos aínda máis illados, polo que é fundamental garantir unha rede viaria moderna, segura e adaptada ás necesidades reais da poboación” afirma Rego.

“Seguiremos defendendo o Sur de Lugo, exixindo investimentos e denunciando o abandono que vimos sufrindo desde hai décadas. Non imos permitir que se siga discriminando o noso territorio” conclúe Néstor Rego.