O centro de ensino monfortino IES Francisco Daviña Rey, e o CEIP Manuel Luis Acuña de Ourense, veñen de ser premiados no marco do concurso de carteis integrado no programa “Recíclate con Sogama” 2024-2025 canalizado a través do Plan Proxecta da Xunta de Galicia. O colexio ourensán participaba na modalidade de educación Primaria e o de Monforte na de educación Secundaria e Formación Profesional.
Cada centro recibirá unha dotación económica de 1.500 euros, que deberá destinar a material e/ou accións educativas.
Coincidindo coa conmemoración do Día Mundial da Reciclaxe, que tivo lugar o pasado 17 de maio, Sogama fixo públicos estes premios co fin de transmitir o compromiso da comunidade educativa coa xestión sostible dos residuos en xeral e a reciclaxe en particular.
Un xurado conformado por representantes da Consellería de Educación, Ciencia, Universidades e Formación Profesional, e Sogama, foi o encargado de avaliar as candidaturas e elixir os gañadores dos mellores traballos en base a parámetros tales como a calidade do cartel, a creatividade e orixinalidade, a mensaxe transmitida e a claridade na redacción do texto explicativo para facilitar a súa comprensión.
O obxectivo deste concurso é precisamente promover o interese do alumnado pola reciclaxe dos residuos municipais e que, a través da súa imaxinación, expresión e dotes artísticas, difunda as súas bondades para a protección do medio ambiente e a saúde.
A OBRA GAÑADORA DO IES FRANCISCO DAVIÑA REY
O traballo do instituto monfortino reproduce a imaxe dunha muller abrazando o planeta co símbolo da reciclaxe, utilizando para isto unha gama de cores na que destaca o verde. No texto que acompaña o debuxo (“Reciclar é dar unha segunda vida aos recursos, protexendo o planeta para as xeracións futuras”) explícanse as vantaxes da reciclaxe na redución da produción de residuos, no aforro de enerxía e a posible diminución dos custos de produción para as empresas.
Dende a dirección do centro explican que, “aínda que o premio é un recoñecemento ao traballo desenvolvido polos grupos participantes no Plan Proxecta Recíclate con Sogama, a autora do debuxo que seleccionou o centro para enviar ao concurso foi Ainara Pol Marín”.
“Recíclate con Sogama” 2024-2025
Trátase dun programa educativo promovido por esta empresa pública cuxo obxectivo principal é instaurar e fomentar a recollida selectiva de residuos nas aulas e propiciar que as boas prácticas se trasladen aos fogares.
Con tal fin, Sogama achegou aos centros participantes, tanto de Primaria como de Secundaria e Formación Profesional, distintos medios materiais e didácticos para que poidan levar a cabo os seus proxectos, que son supervisados periodicamente por educadores ao servizo desta empresa pública a fin de orientar os seus enfoques e resolver posibles dúbidas.
