Este luns pola tarde presentouse o BTT DH Molinos, co aliciente engadido de formar parte por primeira vez do calendario de probas da Copa de España de BTT DH Descenso. O programa da proba comeza o sábado -31 de maio- cos adestramentos e dispútase o domingo -1 de xuño- a partir das 10.30 horas.
Ademais das categorías que competirán a nivel nacional, haberá unha categoría infantil de carácter autonómico para ofrecer aos máis pequenos a oportunidade de facer tamén esta proba.
Colaboran coa iniciativa a Vicepresidencia da Deputación de Lugo e a Xunta de Galicia. O delegado territorial de Lugo, Javier Arias, felicitou ao club DH Galicia polo traballo que realizan para organizar unha cita de primeiro nivel que forma parte do circuíto nacional. Arias apuntou que esta actividade vai en liña coas accións da Xunta en favor da promoción do deporte, o respecto polo medio natural e a dinamización do territorio. Sinalou ademais que supón unha oportunidade para poñer en valor a riqueza paisaxística da zona e o seu potencial para fomentar o turismo deportivo.
Pola súa banda Efrén Castro, desde a Vicepresidencia encadrou “o apoio á proba na colaboración co DHG Team, cunha traxectoria moi destacada na promoción desta modalidade na provincia, a través da organización de probas pero tamén da formación das rapazas e rapaces de Sarria e da comarca” e destacou “a importancia deste tipo de competicións para a proxección estatal do tecido deportivo da provincia e a participación das e dos deportistas lucenses e galegos”.
