A programación do Festival desenvolverase os días 20 e 21 de xuño, cunha selección musical diversa que abrangue dende o rock e o punk ata a música tradicional galega e propostas máis contemporáneas. O venres, 20 de xuño, subirán ao escenario Gin Toni’s, Trashtucada, Dakidarría, Linaje, Laura DSK, Caamaño & Ameixeiras, Leo de Matamá e Baturruka. O sábado, 21 de xuño, será a quenda de Sés, Sínkope, Ilegales, Radiocrimen, Rastreros, Montedapena, Brais das Hortas e os enérxicos Festicultores Troupe.
As entradas están dispoñibles a través da web oficial do festival, www.treceroisfest.com. O prezo por día é de 18 euros, mentres que o abono para os dous días custa 27,50 euros, máis os correspondentes gastos de xestión.
O festival promove activamente os produtos locais, a cultura e a identidade da xente da terra, todo isto nun marco incomparable como é a Ribeira Sacra. Nas dúas xornadas contarase cunha programación parella que inclúe catas de viño, degustacións gastronómicas e a Feira de Artesanía, que mantén aberto o prazo de inscrición para profesionais do sector a través da súa páxina web oficial.
O Trece Roeis Festival conta coa colaboración do Concello de Pantón, da Xunta de Galicia e da Vicepresidencia da Deputación, ademais de empresas da zona, da DO Ribeira Sacra e do Consorcio de Turismo.
O delegado territorial, Javier Arias, felicitou durante a presentación á asociación Os Trece Roeis polo “éxito crecente desta cita de referencia no calendario musical da Ribeira Sacra e do conxunto da provincia, que favorece a chegada de milleiros de visitantes a Pantón atraídos pola oportunidade de dous días de música en directo e da oferta lúdica e cultural complementaria”.
A deputada de Cultura, Iria Castro, sinalou como prioridade para a área de Cultura o apoio aos festivais que se organizan desde o tecido asociativo, “máis aló do que mobilizan neses días, contribúen a facer comunidade e promoven a actividade cultural no seu entorno. O programa conta con diversidade de espazos e de actividades para abrir o festival a públicos de distintas idades e intereses ou preferencias musicais”.
