Do 1 de marzo ao 31 de maio, o Concurso de Proxectos Empresariais Semente Ribeira Sacra, tiña aberto prazo para a inscrición de ideas. Nesta edición do certame, que busca proxectos innovadores para desenvolver o medio rural e poñer en valor os seus recursos, inscribíronse 72 persoas. Unha vez comprobadas as inscricións de persoas e as ideas presentadas, 51 das propostas cumpren todos os requisitos para ser avaliadas agora polo xurado que o día 22 deste mes de xullo dará a coñecer o nome das 10 ideas que pasan á fase final.
As ideas seleccionadas presentarán entre o 1 de agosto e o 30 de setembro do 2025, o proxecto rematado, achegando arquivos PDF mediante formulario na intranet de concursantes da web www.sementeribeirasacra.org.
Unha vez presentada a documentación, o xurado convocará aos finalistas para a exposición e defensa do seu proxecto, na xornada de mañá do día 8 de novembro, no Parador de Turismo de Monforte. Pola noite durante a cea de clausura, tamén no Parador, celebrarase a entrega de premios desta décima edición.
- 1º Premio – 10.000 €
- 2º Premio – 6.000 €
- 3º Premio – 4.000 €
- Plan de Formación (AGADER) para os 10 proxectos que se presenten á final e manifestaran, entre o 23 e o 31 de xullo de 2025, o seu interese en participar no plan formativo que se desenvolvería no primeiro semestre do 2026.
A esta edición do concurso presentáronse ideas de moi diversa finalidade: proxectos educativos, aplicacions para conectar turistas, tecnoloxía aplicada ás viñas, rutas e experiencias a medida, plataformas para aloxamentos, distribución de produto, proxectos musicais e de rehabilitación. Ademais de proxectos de empredemento ao redor da gastronomía, terapias de benestar, artesanía, bebidas, cosméticos, museos e laboratorios de memoria rural ou a utilización de drons para o traballo agrícola.
Presentación proxectos Semente Ribeira Sacra 2024 / Concurso de Proxectos Empresarais Semente Ribeira Sacra
