Do 6 ao 10 de xullo, deportistas da Federación Galega de Piragüismo están a participar nunha concentración en Ponts (Lleida), no mesmo canal onde se disputará a finais de agosto o Campionato de España por Seleccións Autonómicas en Idade Escolar (CESA).
Esta concentración técnica, din dende a federación galega, “serve como preparación clave para o noso equipo, que traballa baixo a dirección dos técnicos Luís Fernández, Xiana Vasco e Manuel Freiría, con dedicación, ilusión e espírito de equipo”.
Tres deportistas do Club Quixós de piragüismo viaxaron xunto con compañeiros e compañeiras doutros clubs galegos á devandita concentración e aproveitaron a viaxe tamén para competir esta pasada fin de semana na 3ª Copa de España de Jóvenes Promesas de Slálom disputada en Sort. Sara Inés Varela e Xoel Fernández acadaron tres medallas. Sara foi ouro en K-1 e prata en C-1 cadete; e Xoel Fernández, levou un bronce en K-1 infantil e quedou cuarto en C-1. O outro piragüista monfortino da expedición foi Martín Prats.
