Metal Power é unha empresa familiar que conta con preto de vinte traballadores, sendo a principal fonte de emprego privado en Triacastela, segundo apuntan desde o PSdeG-PSOE. As actuais instalacións, un pequeno taller familiar, son insuficientes e obrigan a operar por quendas. Levan anos pedindo solo industrial para construír unha nave máis grande que lles permita desenvolver o seu traballo.

Os socialistas lamentan que o goberno local non ofrecera solucións, “tras agardar máis dunha década pola creación dun polígono industrial e ante a falta de compromiso da alcaldesa, a empresa viuse obrigada a marchar a outro concello, onde xa adquiriron varias parcelas para garantir a súa viabilidade e o seu crecemento”.

Desde o PSdeG de Triacastela critican o proceder do grupo de goberno municipal e afirman que, “forzaron á empresa a marchar de Triacastela por non poder desenvolver axeitadamente a súa actividade, incumprindo as promesas feitas ao empresario, que ademais figuraban no propio programa electoral da alcaldesa”.