O festival Terra Brava do Incio celebrará a súa vixésimo segunda edición o día 16 de agosto. Como mostra do apoio económico da Xunta de Galicia, o delegado territorial de Lugo, Javier Arias, participou días atrás na presentación do cartel xunto co alcalde do municipio, Héctor Corujo, e Luis Valcárcel, presidente da asociación Terra Brava, organizadora da cita.
O apartado musical estará cuberto polos galegos Lamatumbá, Sacha na horta, Mekanica Rolling Band e DJ Um Sincero, e os portugueses Kumpania Algazarra. Os concertos comezarán a partir das 19:30 horas na carballeira a carón do campo de fútbol.
Previamente haberá sesión vermú, amenizada por Xermolos, e despois a tradicional comida popular quecontará coa actuación da Escola de Música do Incio. A primeira hora da tarde está previsto o espectáculo infantil de Brais das Hortas.
Os organizadores puxeron á venda camisetas nos comercios do Incio para as persoas que queiran colaborar e os tíckets para o xantar poden mercarse na ferretería da localidade.
