Segundo Esperta Monforte a resposta dada no pleno á súa pregunta, de por que o concello colabora con España Creativa e non con Semente Monforte, “demostra desleixo á hora de xestionar os fondos municipais”. José Tomé xustificábao como que “Semente non é creativa”.
Esperta Monforte reclama que as subvencións se concedan con base a principios de igualdade, méritos e transparencia “e non segundo simpatía ou lemas alleos aos intereses da veciñanza”.
Para respaldar a súa reclamación explican que o Concurso de Proxectos Empresariais Semente Ribeira Sacra “é unha iniciativa consolidada con raíces no territorio que aposta pola dinamización sociocomunitaria e pola cultura desde abaixo”. Pregúntanse se iso non é creativo e que criterios segue o alcalde para distinguir o que merece ou non apoio económico.
Esperta Monforte refírese tamén “á incoherencia do alcalde ao promover campañas de apoio ao comercio local mentres realiza compras institucionais fóra de monforte”. Segundo as fontes de Esperta Monforte, “as medallas e insignias que se entragaron aos membros da corporación municipal encargáronse en Lugo, mentres o concello promove campañas para fomentar o comercio local”.
E conclúen asegurando que no concello cóntase con profesionais para estes encargos, “e que a promoción do consumo de proximidade non debería limitarse a campañas puntuais”.
