Os socialistas de Pantón comprobaron de primeira man esta realidade no propio centro médico, onde lles confirmaron a falta de cobertura e constataron que non existe ningún cartel informativo que avise á veciñanza desta situación.

Advirten, ademais, de que esta redución do persoal médico coincide coa época do ano na “que Pantón multiplica, como mínimo, por dous a súa poboación debido á chegada de veciñas e veciños retornados e visitantes, o que provoca unha maior demanda asistencial. A situación agrávase especialmente esta fin de semana, cando se celebran as festas do municipio, que atraen a centos de persoas máis e xeran unha maior necesidade de atención sanitaria”, aseguran.

“É inaceptable que, sabendo esta realidade, a Xunta non garanta unha cobertura médica axeitada, poñendo en risco a atención sanitaria e a saúde das nosas veciñas e veciños”, sinalan desde a agrupación.

O PSdeG-PSOE esíxelle á Xunta que adopte medidas urxentes para cubrir todas as ausencias e garantir que o centro de saúde de Pantón dispoña, como mínimo, do mesmo número de profesionais que o resto do ano, reforzando ademais o servizo durante o verán para dar resposta ao incremento de poboación.