Foi o papa Bonifacio VIII o que proclamou no 1300 o primeiro ano xubilar, establecendo que quen visitase trinta veces ao longo deses doce meses as basílicas de San Pedro e San Pablo obterían a indulxencia plenaria e que aqueles peregrinos que chegasen de fóra de Roma só terían que visitalas quince veces.
Este 2025, as seis dioceses que abarcan o territorio galego poñen ao dispor da poboación decenas de templos para que, se teñen dificultades para peregrinar a Roma, poida gañar o xubileu en Galicia.
Ademais dos templos xubilares designados durante todo o ano santo, as dioceses designaron tamén outros lugares de culto nos que gañar o xubileu en datas concretas. É o caso do Santuario de Cadeiras no que haberá unha xornada xubilar o vindeiro 31 de agosto, domingo.
Para gañar o xubileu e obter a indulxencia plenaria non só hai que visitar algún dos templos xubilares que designaron os distintos bispados senon que tamén cómpre confesarse, comulgar, rezar polas intencións do Papa e ter verdadeiro arrepentimento.
A xornada de Cadeiras dará comezo ás 12:00 horas coa celebración penitencial. De seguido haberá unha eucaristía e, ao remate, a Virxe será baixada ata Pinol.
