O PSdeG-PSOE de Sarria alerta de dúas situacións que “afectan á imaxe, á comodidade e ao patrimonio da vila”: a instalación de seis contedores de lixo xuntos en pleno centro urbano, a escasos metros de terrazas de bares e restaurantes”, e o estado de abandono da Ponte da Áspera, un dos monumentos máis emblemáticos do Camiño de Santiago ao seu paso polo municipio.

O voceiro socialista, Benjamín Escontrela, cualificou estas actuacións e omisións como “un exemplo máis da deixadez e da falta de sensibilidade do Alcalde, que prexudica tanto á veciñanza como aos visitantes”.

Segundo explicou o voceiro socialista, Benjamín Escontrela, a recente colocación dos contedores “xera un impacto visual moi negativo, malos cheiros e unha convivencia forzada entre espazos de lecer e puntos de recollida de lixo”. A esta situación engádese un panel informativo no centro da vila que resulta ilexible e que “non cumpre a súa función básica, que é informar”. O PSdeG reclama a reubicación inmediata dos contedores, a limpeza e mantemento reforzado da zona e a reparación do panel informativo para que cumpra a súa función.

No ámbito patrimonial, Escontrela advertiu do estado de abandono da Ponte da Áspera, construción de orixe medieval con tres arcos románicos que forma parte da etapa entre Sarria e Portomarín do Camiño Francés. Este paso sobre o río Celeiro é unha referencia histórica e cultural, mais presenta danos visibles na calzada e na súa contorna que poñen en risco tanto a seguridade dos veciños e peregrinos como a imaxe patrimonial de Sarria. “É unha vergoña que estea neste estado de deixadez, que pon en risco tanto a seguridade de camiñantes como a integridade do patrimonio”, denuncio Escrontela.

Piden os socialistas que o Concello demande da Xunta e de Patriminio unha intervención inmediata. Instan ao goberno local a actuar con urxencia e responsabilidade para resolver estas dúas cuestións, “que danan a imaxe da vila, incomodan á veciñanza e desprezan o noso patrimonio histórico”.