A Serra do Courel, unha das xoias ecolóxicas de Galicia, volve a estar en perigo tras o grave incendio de 2022, que arrasou boa parte desta fermosa paraxe natural. As lapas, que avanzan por Quiroga, tras saltar a este concello desde O Larouco, ameazan a zona da Volta Grande.
A aldea de Outeiro está en perigo, ao igual que as aldeas do Mazo e Soldón da Seara. Xa hai buldozers traballando para defender A Seara, Vieiros, Feramulin. En Hórreos, grupos de brigadistas e voluntarios están a rozar o monte e limpar a aldea por medo a que suba o incendio desde a parte de Vilarrubín.
Precisamente, nesta parte do Courel estase a loitar contra o lume con algúns brigadistas e voluntarios. Foron estes últimos os que na noite do martes conseguiron acometer o lume na ferreiría do Mazo e evitar que se queimara. Con todo, o incendio continúa a avanzar desde Mazais, na Serra dos Cabalos. O lume está a ameazar a aldea de Ferramulín na fronte que vén desde o monte na liña entre Galicia e León.
