Estes días están visitando o Xeoparque Mundial da Unesco Montañas do Courel estudantes palestinos, marroquís, xordanos, iraquís e tunecinos. A visita está enmarcada no proxecto sobre Turismo Sostible como Motor da Protección do Emprego nos Xeoparques, dentro do Programa MASAR: Importancia hidroxeolóxica dos Xeoparques Mediterráneos.
Na fin de semana coñeceron o bosque da Devesa da Rogueira da man de Marcos Reinoso Domínguez de Pía Paxaro e estarán no territorio ata o vindeiro martes 2 de setembro.
Este domingo, 31 de agosto, os estudantes árabes coñeceron no Concello de Quiroga a aldea paleozoica da Seara, onde quedaron abraiados coas habilidades musicais de Xavier Blanco, da Fundación Legar, e coa beleza da aldea veciña de Viveros. Neste último lugar, Paula e Saka, veciños e emprendedores, abríronlles o seu corazón mostrándolles o seu proxecto de vida e a súa filosofía para o mundo.
