A Virxe dos Remedios da Ermida é a figura central dunha romaría con séculos de antigüidade, romaría que ademais está a piques de declararse Ben de Interese Cultural do Patrimonio Inmaterial e para a que tamén se pediu a declaración de Festa de Interese Turístico de Galicia.
Este pasado luns, 8 de setembro, a súa figura lucía a imaxe que presenta dende o pasado ano cando con motivo da súa coroación canónica quitou a vestimenta que a tapaba e amosou a súa forma orixinal realizada en alabastro a principios do século XV. Un novo manto e unha nova coroa engalanaban a imaxe.
Abrindo paso na procesión estaban, como marca a tradición, as emblemáticas figuras do Meco e as Pampórnigas. O “Meco”, que nestas últimas edicións vai xa acompañado do meco pequeno, anunciaba a súa presencia co repique das castañolas e cunha vasoira de toxos coa que afastaba ás persoas para que poidera pasar o cortexo procesional. As “Pampónigas”, dous xigantes que simbolizan a un home e a unha muller, camiñaban ergueitas e ben visibles na distancia encabezabando a comitiva. A continuación destas figuras ía un grupo de gaiteiros tocando unha peza tradicional da comunidade, recuperada polo gaiteiro Colomán González; e de seguido xa os elementos propiamente relixiosos (os estandartes parroquiais, cun realizado recentemente, a imaxe da Virxe e os párrocos), ademais de devotos e visitantes.
Rematada a procesión, e xa na entrada da igrexa, o Meco –cun xeonllo no chan– e as Pampórnigas –baixando a cabeza en sinal de respecto– deixaron pasar á Virxe ao templo. Os máis relixiosos participaron da misa pero outra parte dos visitantes a esta senlleira procesión ficaron na parte máis pagá, o atrio, onde lle tiraron moedas ao Meco seguindo o ritual de el recollelas tras apartar coa vasoira de toxos a todo aquel ou aquela que se interpuxera no seu camiño. Nesta tradición participa tamén, dende hai uns anos, un ‘Meco pequeno’ para interaccionar coa cativada antes do Meco propio.
MARTES 9 DE SETEMBRO
Hoxe hai misas ás 9:30, ás 11:00 e ás 13:00 h. Esta última tamén con procesión e a saída do Meco e as Pampórnigas. A sesión vermú, ao igual que a festa da tarde e noite virán da man da orquestra D’ Noche.
