O delegado territorial da Xunta, Javier Arias, participou esta semana en Bóveda na clausura do obradoiro dual de emprego promovido por este concello xunto cos do Incio e A Pobra do Brollón. A actividade foi financiada pola Consellería de Emprego, Comercio e Emigración con 412.000 euros. Arias animou aos alumnos-traballadores que hoxe recolleron os seus diplomas a “aproveitar as habilidades e coñecementos cos que agora contan para inserirse no mercado laboral”.
A formación teórica complementouse con prácticas laborais que permitiron acondicionar xardíns e zonas verdes dos tres concellos. Así, en Bóveda leváronse a cabo traballos na zona do miradoiro do Alto do Coto, no parque infantil e no entorno da igrexa de Rubián, no Paseo ó Muíño do Xil, na ruta de Remesar ou nos campos da festa de Teilán e Ver.
No que respecta ao Incio, actuouse no entorno do Muíño de Sancho e na área recreativa Fonte do Arnado, na ruta do Mamut e na dos Muíños de Trascastro e Pozo da Ola, ou nas áreas verdes da Praza de España da localidade, na carballeira, o entorno da igrexa e a praia fluvial de Sáa.
Na Pobra do Brollón, as actividades permitiron mellorar xardíns e zonas verdes na área de autocaravanas dos Medos, nas áreas recreativas de Samugueiros e Sáa, e nas rutas de sendeirismo da Cova das Choias, da Castaña e do Mel, ou na da ferrería de Loureiro ó Mazo de Santigoso
Obradoiro Bóveda / Delegación Territorial
