Este programa de actividades comeza neste mes de setembro e prolongarase ata xuño. Neste momento teñen solicitado participar do programa, 13 parroquias: Nogueira, Sabadelle, Merlán, Requeixo, Argozón, Muradelle, Laxe, Brigos, Veiga, Mariz, Santa Cruz de Viana, San Cristovo e Arcos.
Dúas veces por semana, monitores das Escolas Deportivas Municipais imparten clases de ximnasia en cada parroquia no horario que se teña consensuado. “De momento temos máis de 200 persoas inscritas nestas 13 parroquias, pero esperamos que se sumen máis e ampliar a oferta de actividades para seguir promovendo o benestar físico e mental das nosas veciñas e veciños. Con estas actividades favorécese a participación social e redúcese a soidade non desexada ao crear alternativas de lecer con outras persoas”, explica o alcalde de Chantada, Manuel Lorenzo Varela, que lembra que todas as actividades son gratuítas.
Cursos para maiores na vila de Chantada
Na vila do Asma a concellaría de Servizos Sociais do Concello de Chantada tamén organiza cursos destinados a persoas maiores. As actividades desenvólvense no Edificio Multiusos con clases os mércores de pintura o óleo e os venres de pintura en tela, en horario de 16:30h a 19:30h. O primeiro comezará o 17 de setembro e o segundo, o 19 de setembro.
Para o mes de outubro trabállase na incorporación dunha actividade nova, encaixe de bolillos, un curso que se viña demandando e polo que se interesan moitas persoas. Para participar destes cursos deberán anotarse nos servizos sociais do Concello en horario de 9:00h a 14:00h.
