Adif adxudicou as obras de supresión de catro pasos a nivel na liña convencional Monforte de Lemos-Lugo-A Coruña, ao seu paso polo termo municipal de Sarria, por un importe de 819.717,67 euros (IVE incluído). A actuación está enmarcada na modernización do corredor Ourense-Monforte-Lugo e mellorará a permeabilidade transversal, incrementando as condicións de seguridade para a mobilidade dos peóns e os tráficos ferroviarios e viarios.
A clausura dos catro pasos a nivel, situados entre os PK 389/262 e 392/136 da liña, conleva o desmantelamento de todos os seus elementos, así como a disposición de barreiras de contención en cada unha das marxes para impedir o acceso á vía. A solución deseñada consiste na construción dun paso inferior baixo a liña ferroviaria nas inmediacións do actual paso a nivel do PK 390/344, que se suprime. Será unha estrutura en caixón de formigón armado in situ. Ademais, executaranse camiños de ligazón entre os pasos a nivel clausurados e outras infraestruturas de paso existentes.
A supresión destes catro pasos súmase ás actuacións en marcha para eliminar outros 19 pasos a nivel no traxecto Ourense-Monforte-Lugo (dous na cidade de Ourense, dúas en Monforte, nove no termo municipal de Sarria e seis en Lugo capital).
Modernización do corredor Ourense-Monforte-Lugo
Esta actuación enmárcase no plan de modernización do corredor Ourense-Monforte de Lemos-Lugo (117 km), para o que Adif mobilizou uns 626 millóns de euros destinados a reforzar a fiabilidade e capacidade do trazado. O plan comprende, entre outras actuacións, a renovación de vía; o reforzo de infraestruturas (pontes e túneles, así como trincheiras, terrapléns e ladeiras); a electrificación do tramo Monforte-Lugo e a adaptación a 25 kV da electrificación existente no tramo Ourense-Monforte; a renovación de sistemas de sinalización e telecomunicacións, a modernización da estación de Monforte e a construción da nova estación de Lugo, así como a execución do novo túnel de Oural e a prolongación da variante da Pobra de San Xiao. Estas accións contribúen á consecución de diferentes Obxectivos de Desenvolvemento Sostible (ODS), como o 3 (Saúde e Benestar), 9 (Industria, Innovación e Infraestrutura) e 11 (Cidades e Comunidades Sostibles)
