A Asociación Baturruka vén de manifestar publicamente o seu máis rotundo rexeitamento ao ataque contra o edificio de Prodeme, instalacións nas que ensaiaban dende hai anos e onde gardaban parte dos seus instrumentos, moitos deles afectados polo incendio provocado tras o lanzamento dun cóctel molotov.
“O feito de que este ataque tivese lugar precisamente na sala que Prodeme nos cedía para ensaiar dálle unha dimensión máis dolorosa, porque non só se atentou contra un proxecto de acollida solidaria, senón tamén contra a cultura e a convivencia que nós representamos”, manifestan dende a entidade.
No comunicado que fixeron chegar aos medios de comunicación trasladan tamén que “queremos agradecer de corazón ao barrio do Val de Lemos, que nos leva acollendo todo este tempo con agarimo e respecto. Seguiremos formando sempre parte do barrio, porque así nos sentimos. O noso agradecemento tamén á Asociación Prodeme pola cesión desinteresada do espazo durante todos estes anos, facendo posible que Baturruka tivese un lugar onde medrar e compartir música”.
A continuación, sinalan claramente que rexeitan o racismo, a xenofobia e a xenreira. E nese senso consideran que “non hai xustificación posible para quen alimenta o lume do fanatismo”, e tamén que “estes discursos de odio só sementan división, medo e violencia. A nosa resposta, como sociedade, debe ser a contraria: solidariedade, convivencia, cultura e dignidade”.
Finalmente, rematan o comunicado lembrando que a música que fan é un canto á diversidade e á unión, motivo polo que seguirán adiante, máis fortes e comprometidos/as ca nunca para demostrar que a xenreira non terá a última palabra.
