O alcalde de Sarria, Claudio Garrido, defendía o pacto cos populares, “Pode ser un mecanismo útil e beneficioso para a cidadanía cando se prioriza o diálogo e o entendemento e búscanse solucións aos problemas e demandas da xente”. Adiantou tamén que co desenvolvemento dos 15 compromisos, a súa formación política dá por cumpridos os seus obxectivos fundacionais. Preguntado por Europa Press, o rexedor asegurou que non se trata dun pacto de goberno, senón dun acordo polo desenvolvemento do municipio co que a súa formación independente “dá por cumpridos os seus obxectivos electorais”.
Este luns en rolda de prensa o secretario xeral do PSdeG-PSOE na provincia e presidente da Deputación, José Tomé, cuaficaba este acordo “a maior bazofia política da historia de Sarria”. Tomé Roca afirmou que se trata dun pacto “que só busca arranxar os problemas persoais tanto do alcalde como do PP, dándolle as costas aos problemas reais do municipio”
Tomé acusou ao PP e a Claudio Garrido de actuar con engano e desprezo á cidadanía. “Escenificaron unha gran mentira ao pobo de Sarria, unha burla aos votantes. Estes teóricos 15 puntos do acordo agochan a letra pequena: son un canto ao sol, porque non son executables cando queda pouco máis dun ano de mandato”. O líder socialista felicitou aos concelleiros que rexeitaron participar no acordo. “Hai concelleiros que tiveron a dignidade política e máis da metade negouse a participar nesta farsa. Teño que felicitalos por iso”.
Tomé concluíu asegurando que “boa parte dos votos que tiña a candidatura de Garrido pertencían á esquerda e estou convencido de que a inmensa maioría volverá confiar na alternativa progresista. Hoxe se abre unha nova etapa en Sarria, que debe rematar co mercadeo e a inestabilidade para poñer o Concello ao servizo da veciñanza. O PSdeG-PSOE vai seguir traballando por Sarria, máis que nunca, para limpar o concello”.
