Nos Concellos de Pantón e Sober funciona desde este mes un servizo de asesoramento na tramitación de axudas polos danos do incendio que comezaba na parroquia de Pombeiro o 18 de setembro e que a Xunta daba por extinguido o 30 de setembro despois de calcinar 1.805 hectáreas, entre os municipios de Pantón e Sober.
Despois dos incendios de agosto, que afectaron principalmente á provincia de Ourense, a Xunta de Galicia aprobou unha serie de medidas urxentes para axudar na reparación dos danos causados polos lumes. Esas medidas amplíanse tamén a incendios posteriores como o que afectou a Pantón.
De modo que ata o 30 de outubro, as veciñas e veciños afectados poden acceder a un paquete de axudas para os danos producidos en vivendas, explotacións agrogandeiras, negocios, empresas e concellos.
O alcalde do Concello de Pantón, José Luis Álvarez, asegura que o municipio ía contar desde o comezo con este tipo de servizo, “xa que Pantón padeceu importantes danos con vivendas afectadas. A conselleira de Medio Rural, María José Gómez, xa anunciara que contariamos con axuda técnica para atender as xestións das persoas afectadas. Pensamos que o mellor espazo sería a casa da cultura e preparamos o acondicionamento técnico necesario para que desde este venres se poida comezar a axudar nas tramitacións”.
Para facilitar a cobertura e tramitación das solicitudes o Concello de Pantón habilita este servizo no que se poderán xestionar as axudas de Medio Rural, Medio Ambiente e Vivenda. Desde este martes, 7 de outubro, haberá asesoramento específico para comunidades de montes. O horario de atención é de 9:00 a 14:00 de luns a venres na planta baixa do centro sociocultural.
