Por que é necesario o feminismo hoxe? Esta será a pregunta de saída a partir da cal Olalla Rodil fale de feminismo e dos principios sobre os que se asenta o pensamento feminista.
O acto, organizado polo Bloque Nacionalista de Quiroga, estará presentado pola concelleira Amparo Montenegro que dará paso á deputada no Parlamento Galego para que analice o panorama sociolóxico actual no que, aínda que se avanzara en concienciación e lexislación, a discriminación e o sometemento das mulleres segue sendo unha triste realidade.
Segundo entende Rodil, o feminismo non trata de varrer para un lado, o feminismo busca rematar coa desigualdade estrutural na que vivimos e que non é máis que un reflexo dunha sociedade que vulnera e nega a diario os dereitos fundamentais das mulleres.
Para demostrar a desigualdade poñerá enriba da mesa datos que a corroboran como a discriminación salarial e a precariedade laboral. Segundo Gestha (sindicato de técnicos de Facenda), a fenda salarial en Galicia é do 28,7% o que supón que as mulleres polo mesmo traballo cobran 5.000 euros menos que os homes. Nestas condicións, se quixesen equiparar os seus salarios aos deles deberían traballar 71 días máis. O 75% dos contratos temporais son asinados por mulleres e tamén en máis do 90% dos casos as reducións de xornada por razón de conciliación -para coidar das fillas/os ou persoas dependentes- son solicitadas por mulleres.
Olalla Rodil abordará, pois, o feminismo dende unha visión especializada e dun xeito moi ameno e fluído, aportando incluso exemplos de situacións que denigran e discriminan á muller que ás veces non sabemos recoñecer no día a día.
Tras a charla abrirase un espazo para que os asistentes pregunten, comenten e expresen as súas opinións e/ou experiencias.
olalla rodil
Olalla Rodil é licenciada en Publicidade e Relacións Públicas pola Universidade de Vigo, Mestrado en Estudos Internacionais pola USC e xornalista. Con competencia contrastada como política, dende o seu escano no Parlamento de Galicia, tamén destaca como gran comunicadora e conferenciante especializada en temas de feminismo.
