A voceira do popular, Katy Varela, amosou o seu desacordo co anuncio de Tomé de destinar 677.000€ á construción dunha gran fonte ornamental no parque dos Condes porque “non responde ás verdadeiras necesidades dos veciños de Monforte”.
Katy Varela denuncia que este investimento suporá a eliminación dunha parte da zona verde, moi empregada polas persoas maiores que acoden a diario ao parque. “En lugar de minimizar a zona verde o Concello debería de apostar por unha actuación máis útil e respectuosa coa contorna, como a instalación dunha cuberta ornamental, que permita aos usuarios do parque seguir desfrutando do mesmo tamén no inverno, ao abeiro das inclemencias meteorolóxicas”, afirmou.
Os populares sinalan que o municipio ten necesidades moito máis urxentes sen solucionar, como “a mellora das instalacións do centro de día, o aumento das prazas na gardaría municipal ou a dotación de máis medios para o SAF, que na actualidade conta cunha ampla lista de agarda”.
Tamén o BNG reacciona ante o anuncio do alcalde de Monforte dunha gran fonte no Parque dos Condes, “trátase dun proxecto propio doutro tempo, sen prioridade social nin ambiental, que responde máis á megalomanía do señor alcalde que ás necesidades reais da veciñanza”.
“Con 677.000 euros poderíanse mellorar moitos servizos que si son urxentes: levar o saneamento ás parroquias, arranxar o mercado gandeiro ou crear un parque de mascotas digno. Pero o alcalde prefire gastar o diñeiro en formigón e luces”, afirmou Emilio J. Sánchez, voceiro municipal do BNG.
Desde o Bloque lembran que os cartos públicos deben empregarse con sentido e responsabilidade, atendendo as demandas reais da cidadanía e non en proxectos de escaparate. A este respecto critican as declaracións da voceira do PP, que pediu que ese investimento se destinase a reforzar o Servizo de Axuda no Fogar (SAF) ou a gardería municipal, “quen ten a obriga de financiar eses servizos é a Xunta de Galicia, non o Concello. É unha mostra máis da súa incoherencia e da falta de seriedade do PP cando se trata de defender os intereses de Monforte”, subliñou Manuel Luaces, responsable local do BNG.
