A Asociación de Veciños de Bazal, con máis de dúas décadas de existencia nesta parroquia pantonesa, vén de facer unha viaxe a Lalín aproveitando a tempada de outono e que lles empezaba o bandullo a pedir un bo cocido.
Pasaron o día na capital do Deza e xantaron cocido no restaurante e museo etnográfico rural, Casa do Patrón, onde as persoas participantes o pasaron moi ben porque lembraron “os seus tempos”, como explica o presidente da asociación veciñal, Carlos Escudero, “participaron da viaxe unha trintena de persoas, algunhas delas de case 90 anos que puideron ver ferramentas e outros utensilios cos que traballaban antes. Tamén familia ou fillos dos asociados que están fóra e viaxaron con nós. Ao remate estaban todos encantados e pensando en repetir”.
A entidade, que conta con 53 asociados nunha aldea de vinte e poucos veciños, organizou un magosto o pasado 1 de novembro e desde mediados do vindeiro mes iluminarán Bazal para darlle a benvida ao Nadal. A vindeira excursión terá que esperar á primavera e o destino será a Mariña Lucense, onde verán, entre outras paraxes, a coñecida Praia das Catedrais.
