Os concelleiros do Grupo Municipal Popular de Monforte de Lemos esixiron ao alcalde, José Tomé, a súa dimisión como rexedor, onde se mantén sen as siglas do PSOE tras anunciar a súa dimisión como presidente da Deputación de Lugo –onde está en funcións despois de rexistrar a súa renuncia–. En rolda de prensa, os populares cualifican de “moi grave” que, “a día de hoxe, José Tomé segue sen explicar publicamente en que situación se atopa o Concello de Monforte”.
A portavoz popular, Katy Varela, acompañada dos concelleiros do Grupo Municipal, lembrou que pide a dimisión de José Tomé como alcalde despois do “grave escándalo de suposto acoso sexual pola súa banda contra seis mulleres”, a pesar do que “continúa exercendo como alcalde, pero debería dar un paso atrás como rexedor municipal e entregar a acta”. “Esta persoa non pode seguir nin un minuto máis á fronte da alcaldía, polo ben da imaxe da cidade, da institución e da súa propia credibilidade”, sostén.
Ademais, Varela fai fincapé “na confusión” que hai no goberno local, xa que “despois de que Tomé anunciase que tanto el como os seus concelleiros deixaban o grupo socialista, hoxe recoñeceu, ao ser preguntado pola situación na que quedaba o Concello, que os concelleiros que o acompañaban formaban parte do Grupo Socialista”. “Non sabemos se se incluía el mesmo ou non como membro do Grupo Socialista, pero parece unha auténtica tomadura de pelo que non aclare a situación real na que se atopa o goberno local e o propio Concello de Monforte”, critica. Respecto diso, acusa ao BNG de pórse de “perfil” ante este caso e que “opte por branquear ao máximo a súa figura”.
