O Concello de Taboada organiza na tarde deste domingo 28 de decembro unha obra de teatro, “Berenguela na gaiola”, que se poderá ver no Cuartel Vello ás 18:00 h.
Trátase dunha divertida e emotiva proposta para público familiar que fan posible Galeatro e Xarope Tulú en colaboración co Centro Dramático Galego e o Festival Internacional de Teatro de Carballo (FIOT). A dramaturxia e dirección corre a cargo de Paula Carballeira e o elenco de actores está composto por Alba Bermúdez, Tone Martínez e Atenea García. Esta peza foi gañadora do IV Certame Manuel María de Proxectos Teatrais en 2025.
A montaxe comeza cando nunha residencia da terceira idade traen de volta á Berenguela, una anciá que aproveita para fuxir en canto pode. Quere volver á súa casa na aldea, onde sempre viviu, onde é feliz. Berenguela protesta, rosma, funga, ata que a súa amiga Aurora consegue acougala. Aurora é outra anciá prisioneira, unha anciá que non lembra ben quen é, así que pode ser o que ela queira. Na mesma residencia está Tomás, que pasa o día mirando pola xanela, cismando nas súas cousas, triste e gris. Representando ‘Aventuras e desventuras dunha espiña de toxo chamada Berenguela’, de Manuel María, as tres anciás atoparán a liberdade que cren perdida e a posibilidade de cambiar o mundo.
A obra forma parte do programa Móvete 2025 do servizo de Cultura de Vicepresidencia da Deputación Provincial de Lugo.
TEATRO NO CONCELLO DE QUIROGA
O Auditorio Municipal de Quiroga acolle este domingo ás sete da tarde, “A viaxe do Señor López”, montaxe a cargo de Señor López Producións. A obra forma parte do programa Circuitos de Teatro da Deputación de Lugo.
O señor López é unha persoa solitaria, triste e gris. Un día calquera acontécelle unha desas cousas solitarias, tristes e grises tan característica do mundo dos adultos e a partir dese momento todo cambia. Monta unha compañía de teatro. Aprende a contar chistes, fala idiomas inventados. Viaxa nunha balsa por un mundo cheo de cores e alegría. O señor López convértese nun paxaro-Inuit. Unha montaxe que achegará un sorriso ao público familiar.
