A Deputación de Lugo potenciou este 2025 os encoros, o románico e as viaxes de proximidade para afianzar o seu modelo de turismo sostible e de calidade. Os tres programas turísticos destacados foron ‘Coñece a túa provincia’, ‘Rutas polo románico’ e ‘Turembalses’ segundo se salientou última reunión do ano do Concello Provincial de Turismo celebrada o día 26 de decembro.
COÑECE A TÚA PROVINCIA
Coñece a túa provincia é un programa da Deputación de Lugo que ten como fin a realización de viaxes de balde dun día de duración pola provincia que ten como beneficiarias asociacións con sede na provincia de Lugo.
Un total de 135 asociacións sen ánimo de lucro participaron este 2025 na quinta edición do Coñece a túa provincia, volvendo ser esta iniciativa un éxito de participación.
RUTAS POLO ROMÁNICO E TUREMBALSES
Preto de 300 persoas participaron este ano nas visitas a monumentos románicos en 19 concellos entre maio e xuño, no marco do programa Rutas polo románico da provincia.
Outro proxecto de turismo no que participou a Deputación de Lugo foi Turembalses, para promocionar o turismo de presas, e no marco desa iniciativa puxo en marcha o programa Encoro Aventura, de experiencias singulares relacionadas con esas infraestruturas.
OUTROS EVENTOS E PROGRAMAS TURÍSTICOS
A institución provincial tivo presenza tamén nunha decena de feiras turísticas de referencia como: Fitur, Expomar, Fairway ou Xantar; e mantivo accións de patrocinio e axudas destacadas para fortalecer o sector turístico.
Ademais, a Deputación continuou apostando por un dos motores de atracción de visitantes da provincia: as rutas fluviais. No 2025 unhas 57.000 persoas percorreron a Ribeira Sacra a bordo dos catamaráns da institución.
